«Жастар» спорт сарайында Тәуелсіздіктің 25 жылдық мерекесіне орай қазақ күресінен «Талдықорған бөрісі» іріктеу турнирі өтті. Қала әкімінің жүлдесіне арналған бұл жолғы айтулы додаға 30 балуан қатысып, өзара күш сынасты.

Шығыс жекпе-жек өнерінде талай белес­терді бағындырып жүрген ұландарымыз жетерлік. Ұшы қиырсыз бұл спорттың түрін меңгерген ұл-қыз­дарымыз әлемдік аренада атой салып, ел намысын жоғары ұстауда. Тәуелсіздік алғаннан кейін елімізде қолға алынған джиу-джитсу спорты қанатын кеңге жайды.

Өзінің сан қырлы салалы әдіс­терімен жеткіншектерді баурап алған жекпе-жекке қызығушылар қатары көбейіп, түрлі турнирлердің де саны артты. Міне, осындай спортқа қызық­қандардың арасында Жандос Нұрмұханбетов те бар.

Жандос бұл спорттың түрімен жасынан айналысады. Алғашында дзюдо күресіне барған жеткіншек бертін келе джиу-джитсуға ауысты. Айдос Усабаевтың қоластына өткен жас спортшы өзін жақсы қырынан көрсетті. Бапкердің үйреткен әдіс­терін сауатты жасап, шеберлігін шың­дай түсті. Болашағынан көп үміт күттірген Жандос көптеген жарыстарға қатысты. Алғашында қала, облыс, республикалық додаларда жұлдызы жарқырап, жүлдегерлер санатынан көрініп жүрді. Талайдың мысын басқан Жандос Ержанұлы жуырда тамаша жетістікке қол жеткізді. Бұрын ел ішіндегі бәсекеде айдарынан жел ессе, бұл жолы әлемдік сыннан қанжығасы майланды. Испанияның Мадрид қаласында өткен жастар мен жасөспірімдер арасындағы әлем чемпионатына қатысып қайтты. Ел намысын қорғауға Қазақстаннан он екі спортшы бақ сынады. Сол саңлақтардың арасынан екі ұланымыз жүлдеге қол жеткізіп қайтты. Оның біріншісі 69 келі салмақта астаналық Дархан Нұртаев қолаға қол созса, екінші қоланы 56 келіде Жандос еншіледі. Жетісулық жігіт алғашында жасөспірімдер арасында бақ сынауы тиіс еді. Он алтыға жаңа толған Жандос Мадридте жастар арасында өнер көрсетеді. Жарыс­ты ұйымдастырушылар жастар мен жасөспірімдерді біріктіріп, бір жарыс етіп өткізген. Өзінен едәуір үлкен болса да сынға түскен жерлесіміз қаймықпады. Жеңілсем жер көтереді, ел намысын аяққа таптатпаймын деген ұлы даланың ұланы қарсыластарына оқша атылды. Бірінші кездесуінде Румыния спортшысына қарсы тұрды. Талайды тас-талқан етіп ұтып жүрген Жандос қарсыласын ойсырата жеңді. Екінші жекпе-жегінде Словения спортшысын жолынан тайдырды. Жартылай финалда италиялық спортшыға жол берді. Әлемдік сында әбден ысылған италияндық спортшы біздің ұлдың қармағына түспеді. Оның үстіне жасы да үлкен. Бұғанасы жаңа бекіген Жандосқа сол жағы кедергі келтірді. Әттең, өз жасы болғанда мүмкін алтын жүлде біздің уысымызға түсер ме еді? Оның үстіне бұл чемпионат Жандостың алғашқы әлем біріншілігі. Иә, оған бола қапаланбады. Қолаға таласу кезінде неміс спортшысын атойлап жүріп ұтқан жетісулық Жандос Ержанұлы алғаш қатысқан әлем чемпионатынан қола жүлдені қанжығасына байлады. Көк туды көкке өрлеткен жерлесіміз әлі талай биік белестен өтетінін бапкер алдында айқын дәлелдеп, елге толайым табыспен оралды.

ӘМІР САНА