Бүгінде аталған мекеменің Үштөбе бекетінде жол шебері қызметін атқаратын Бекет Дүй­сен­­бекұлы жаздың аптап ысты­ғына шыдап, қыстағы ақ қар, көк мұзға қарамастан аянбай еңбек етуде. Теміржол бойымен жүріп, жол қауіп­сіздігі шара­ларын өз қолы­мен атқарады. Теміржол аса қыра­ғылықты қажет етеді. Жолау­шылар мен жүк тасымал­дау­шы­лар қа­шан­да теміржол бақылаушы­ларына сенім ар­та­ды. Олардың қауіпсіздігін сақтау – Бекет пен әріп­тестерінің басты бо­рышы.

– Өмір құбылыстары әр­түрлі ғой. Кім қай жерде тұ­рақ­ты еңбек етіп жүрсе, сол жер­дің ахуалына бейімделеді. Яғни, маң­дайына бұйырған кәсібінің несі­бесін тере­ді де. Теміржолдың да өз тіршілігі, қызығы бар. Темір­жол қы­зығын тамашалаған бала кезім ойыма оралады. Қалаған ма­ман­дығым бойынша еңбек жолын бастаудың оңайға соқ­пағаны анық. Алға­шында өзім­нің еңбекқор­лығыммен ауыр жұмыстың ыс­тығына күйіп, суығына тоңған ардагер теміржолшылардың сын-ес­керт­­пелері үлкен көмек бол­ды. Сон­дай-ақ, осы мекемеге келге­німде жұмысқа деген қызығу­шылығымды арттырып, өз ақыл-кеңесін аямаған әріп­тесім Мадияр Әбішевке айтар алғысым шексіз. Әрине, ма­ман­­дықтың қыр-сырын мең­геру үшін жалаң еңбектің пай­дасы жеткіліксіз. Ол жұмысқа деген құлшыныспен астасып жатса, адам­ның өз ісінің хас шеберіне айналуы ғажап емес, – дейді теміржолшы жігіт.

Бойында барлық абзал қа­сиет­­тері бар азамат өз маман­дығы тура­лы сөз қозғағанда көз­дері оттай жанып, күн­де­лікті атқаратын жұмы­сын ерек­ше ықы­ласпен баяндады. Сөз ара­сында: «Егер өмірге қайта келе­тін бол­сам, өмірімді осы темір­жолмен өрер едім. Өзімді басқа маман­дықта елес­тете алмай­мын», – деп жы­миып қойды.

Кәсібіне берілген еңбек­қор жі­гіт­­тің өмірге, жұмысқа деген құш­тарлығы ерекше. Әр сөзінен бола­шаққа деген сені­мі байқа­лады. Болат жолды өмірлік кәсіп, отбасы­лық нәсіп еткен Бекет Дүйсенбек­ұлының биік белестен көрінуіне тілек­теспіз.

Альфита СЕКСЕНБАЕВА.

Қаратал ауданы.