«Жамбыл – менің жай атым, халық – менің шын атым» атты аталмыш шара­ның шымылдығын облыстық тіл­дерді дамыту жөніндегі бас­қарма басшысы Ахмет Кендір­бекұлы ашты. Ол ақын өмірі мен шығармашылығына аз-кем тоқталып, жиынға қатысушы­ларға сәттілік тіледі.

Сүйінбайды пір тұтқан жыр жампозының тағдыры ал­ты Алашқа белгілі. Ұлы Отан соғысы жылдарында туын­даған өршіл рухты, өрт өлең­дерінің шоқтығы биік тұрғаны – «Ленинградтық өренім» атты жыры. Осы туындының өзінен, заңғар ақынның ізгілік пен қай­сарлық, жомарттық сынды адам­­­ның ең құнды қасиеттеріне қалам тартқандығы белгілі. Әри­не, арнайы білім алмаған Жамбыл қауырсын қаламды қаусыра ұстап, жақұт жырларды терген жоқ. Ол ақпа жырдың арда ақыны болғандықтан да, жау жағадан алған тұста қызыл тілінен іркес-тіркес өлең төгіп, жауынгерлерді рухтандырған рухани қазына іспетті. Аталмыш шарада облыстық тілдерді дамыту жөнін­дегі басқарманың бас маманы Ержан Ақшабаев «Өткеннің өнегесі – бүгіннің баға жетпес байлығы» атты баяндама жа­сап, Жамбылды осы қырынан таныта білді. Сондай-ақ, об­лыс­тық «Тіл» оқу-әдістемелік орталығының оқытушысы Жа­нар Елесбаева «Жамбыл – өр­шіл рухты ақын» тақырыбында дайындаған баян­дамасын тың­дарман наза­рына ұсынды.

Қабылиса, Балпық пен Сүйін­­байлар Жетісу ақын­да­рының өзіндік мектебін қалып­тастырып кеткен тұлғалар. Солар­дың салып кеткен сара жолын жалғап жүрген Айтақын Бұлғақов пен Қаныша Райы­сова Жамбыл жайлы ой толғап, кештің көрігін қыздыра түсті. Сондай-ақ, облыстық Сүйінбай атындағы филармонияның ән­ші­сі Арафат Ысқақ айтыс ақ­таң­герінің «Ақындарға арнау» термесін тамылжыта орындаса, жас ақын Дархан Серік пен Қазыбек Жеңісханның бір қайы­ры­мнан тұрған айтысы тың­дар­мандарды серпілтіп тас­тады.

Жыр жампозына арналған жиынның соңында Ахмет Кен­дір­бекұлы, Айтақын Бұлғақов, Қаныша Райысова, Арафат Ыс­қақов сынды қадірменді қонақ­тарға ақын кітабы мен мерей­тойлық төсбелгі табыс етілді.

Арда БИ.