Мәселен, Үңгіртас селолық округінің аумағында «Империя Фуд» ЖШС үш мың бас ірі қараға арналған бордақылау алаңын өткен жылы іске қосты. Бұл нысан Ұлт жоспарының 61-ші қадамында белгіленген ет өндірісін дамыту жөніндегі тапсырмаға сәйкес ірі қара малы етінің экспорттық әлеуетін арттыру жобасы аясында жұмыс істейді. Қазір онда 1730 бас бұқа бордақыда тұр, әр­қайсысы күніне 2 – 2,5 келі салмақ қосады. Жыл ба­сынан бері бордақылау алаңында семіртілген 331 бас бұқа сойып сатылып, 79 тонна ет тұтынушыларға өткізіліпті. Біз­дің елге қомақты инвестиция салып, үлкен істі бас­тап кеткен серіктестік басшысы ирандық азамат Арман Джавида алдағы уақытта бордақыға қойылатын мал басын 5 мыңға дейін жеткізбекші. Сапасы жоғары әрі табиғи таза өнімдерін Иран, Араб, Ресей, Қытайға экспортқа шығаруды межелеп отыр. 56-қадамдағы «Экономиканың басым секторларына «зәкірлі» ин­вес­торлар тарту» аясында аталған серіктестік биыл қуат­тылығы 8 мың тонналық ет комбинатын салмақ. Сол сияқты Мыңбаев ауылында 1 мың басқа арналған мал бордақылау алаңы бар «Жақсылық» шаруа қожалығы жыл басынан бері Қырғыз Республикасына 20 тонна ет өткізді. Жыл соңына дейін экспортқа 83 тонна ет жет­кі­зу көзделіп отыр.

Ұлт жоспарының 60-шы қадамы ауылда коопе­ра­ция­ны дамыту арқылы сүт өндіру және өңдеуге ст­ра­те­гия­лық инвестор тартуды міндеттейді. Бұл бойынша Қа­ра­қыс­тақта «Табыс» шаруа қожалығы 600 басқа ар­налған тауарлы-сүт кешенінің құрылысын аяқтады. За­манауи үлгіде салынған өндіріс орны шетелдік озық тех­но­логиямен жабдықталған.

Аудан үшін 65-қадамның маңызы зор. Көліктік  инф­рақұрылымды дамыту аясында «Батыс Еуропа – Батыс Қытай» автожолы құрылысы жүзеге асырылады. Бұл жол­дың 100 шақырымнан астам бөлігі аудан аумағы ар­қы­лы өтеді. Жол құрылысымен бірге логистика да­мы­ты­лып, екі ірі демалыс орны салынады.

Сондай-ақ, әлеуметтік жаңартуға арналған қа­дам­дарға сәйкес, білім беруді жетілдіру, 2016–2017 жылдары 5 мектеп салу арқылы апатты жағдайдағы мектептер мен үш ауысымда оқуды болдырмауға қол жеткізілмекші. Бү­гінде 44 балабақша жұмыс істейді. Қазір балалардың мек­тепке дейінгі біліммен қамтылуы 89 пайыз болса, ке­лесі жылдың аяғында бұл көрсеткіш 100 пайызға жетпек.

Ұлт жоспарын орындау жолында ауданда белгіленген негізгі бағыттарды баяндаған әкім тілшілердің әр салада қойылған сұрақтарына егжей-тегжейлі жауап берді.

Серік САТЫБАЛДИЕВ

Жамбыл ауданы.